Pengikut

Pengikut

Advertisement

Sidom Reubat

Ujeun dari baroë hana lom pirang, tanoh Reubat kabéh meulangoë ngen ië. Nakeuh alamat Krueng ka beungeh, hana turi manok, hana turi iték. Nyang paleng sayang that ureung-ureung gampông, kabéh meleuhop asoe-asoe rumôh. Peumeurintah goh trōn jaroë, hana peu ta harap. Reubat beutōi-betōi saboh gampong nyang kureung gaseh peumeurintah. Hana di pakoë lam si klèp mata pih.

Nyak Leman geuduek meurana, hana le asoë rumôh ka di peuanyoet le ië. Nyak Leman  sidroë aneuk piatu. Meuninggai ma watè lahè, hana soe hiroe. Teukeudi tuhan, Adoe ma geuh nyang tueng tém peulara. Seudangkan Ayah Nyak Leman keudéh u tanoh gayo geumeurantoë. Peudéh that udeep Nyak Leman.

Seubagoë aneuk Reubat, nyak Leman udép lagè aneuk-aneuk laen. Teuma nyak Leman si droe ureung nyang hana meunoë-meudéh, hana roë ië mata geuh geujak ngen aneuk-aneuk kaya. Jeut takheun Nyak Leman teumasok aneuk  jeumot, bah pih jak sikula ngen silop, kadang  ngen leuwue-leuwue bukah laju. 

Tép malam aneuk-aneuk tanôh Reubat jak beut, peudalam agama bak si droe Teungku, gobnyan ma’ruf ngen nan teungku di Kruëng, si droe Teungku rayek di tanoh Reubat. Nyak Leman that meusunggoh bak jak beut. Deunge peuneutoh Teungku di Krueng. 

Thōen 1953 adalah thōen prang DI/TII teuka u nanggroë Aceh, Reubat teumasok gampong markas. Meuiring ngen prang nyan, teuka saboh peunyaket rayek, ureung tuha kheun ngen peunyaket beudōk. Sunggoh that sayang nyak Leman teumasök salah sidroë korban peunyaket beudōk nyan, sampoe-sampoe rusak man saboh muka. 

Prang DI/TII  meulanjot laju, padup-padup droe aneuk-aneuk muda Reubat ikot ék glé meubantu peujuang, peuseulamat Aceh, peu ék harkat dan martabat bangsa. Soekarnoe, peumimpin Indon Raya mulai gepeudeuh peumusōhan ngen bangsa Aceh, ka geukhianati Teungku Daud ngen bangsa Aceh mandum nyang le that geubantu nanggroë Indon Raya. Seuhingga, beurkat jasa aneuk nanggroë, Indon Raya jeut teudeng manteng sampoë jinoë. Salah saboh jih adalah  bak bloë peusawat Seulawah. 

Abu Beureuéh tōk geumelakè untok peudeng syari’at Islam di Aceh, hana geusambōt ngen göt le peumerintah Indon Raya, sampoë-sampoë provinsi Aceh ka i lhie le Jakarta beudōk, geu peusaho ngen provinsi Sumatera Utara. Dum nan jeuheut buet.

Teungku Daud semaken beungéh keu pemerintah watéé Soekarnoe geu khianat rakyat Aceh, Soekarno nyan beutoi-beutoi beudōk laknat. Haté binatang Soekarnoe get that dipeulihara. Rakyat Aceh deungen sangat ikhlas geuseudeukah meuh geuh, geuseudeukah pèng geuh untok peukeumah keulai nanggroe Indon Raya yang karap hancō. 

Mansur  dari Sumatra Timu kaleuh geupakat Abu Beureuéh untuk pendeung nangroë Sumatra, teuma ulèh Abu geutulak niet nyan. Gobnyan leubèh geupiléh Indonesia nyang Islam. Beu jeut rakyat Aceh geujalankan syaria’t Allah ngen kaffah, nyan permintaan mulia Abu Beureuéh. Teuma Soekarnoe beudōk ka geukhianati Abu, ulama ngön rakyat  Aceh meugerak. Seumangat prang rakyat Aceh suum keulai, saboh prang yang cukop mulia, prang suci di jalan Allah.  

Nyak Leman ngön aneuk-aneuk miet bak masanyan  hana teupeu sapeu teuntang politèk bangsa. Tep uroë meudeunge sue beudé, sue ureung kliek watee malam ka biasa nibak plinyung aneuk miet lagèè Nyak Leman. 

‘Kita bakar rumah ini semua, ini ruma para separatis...! Si droë teuntara Indon Raya di kuek, peurintah aneuk buah geuh. Malam nyang hana get nibak ureung Reubat. Siat treuk Nyak Leman akan geukalen pakriban apui meu bla-bla ateuh langet i tet rumoh syedara Reubat!

Göt that jeuheut buet teuntra Indon nyan, prèh singeh watee rayek loen, kheun Nyak Leman lam sakét beudōk. Akhe jih bak malam nyan bumoe Reubat abeh i pajoh le apui, sayang that ureung-ureung ineng suah geujak bak syedara geuh  i gampōeng Mali, nasyiet nyang minah u Tiba atawa Tanjông Bungōng.

Ureung-ureng agam di Reubat memang rata-rata nekeuh peujuang mandum. Ureung nyan aneuk murid Tgk Abu Beureueh nyang han tém meunyerah sagai. Meunyerah berarti talōe, hana le harkat tanyoe. Menan keuh nyang Nyak leman deunge dari ureung-ureung lingka. 

Peunyaket beudōk ka dipeurata bak mandum tubōh aneuk miet Reubat, pasukan juang ka geuminah keudeh u uteun, Reubat ka soh ngen aneuk muda. Tinggai ureung tuha ngen aneuk miet. Si ge-ge trok mayèt-mayèt syuhada u tanoh Reubat, nyang ditembak le teuntra Indōn. Seumangat prang sabi seumakin rayek laju.

Seumangat prang sabi get that suum, jeut peutalō sakét beudok Nyak Leman, bacuet-bacuet sakét meukureung. Nyak Leman geutatap gagah Reubat seubagoë harapan ukeuë. Sunggoh that sayang, tanoh Reubat semaken hancō laju-laju teuleubèh bak seumeubeut, padup-padup thōen u likoet, di tanoh Reubat nyoe peureunah hudép balè seumeubuet.

Seumangat menuntot ilmè sabé-sabé geu jok le Tgk di Kreung, teuma padup-padup uroe nyang u likoet Tgk di Kreung ka syahid, teuntra Indōn dengan semena-mena geu tet balee pendidikan, hana le tinggai sapeu. Tgk di Kreung nyang na disinan di tembak le teuntra Indōn beudōk.

Nyak Leman rayek ka bertekad untuk peujuang bangsa, sampoë trōk  keudeuh u uteun. Nyak Leman meugurè ngen salah sidroe peujuang i uteuen, Tgk Baka ma’ruf nan geuh. Ilmè yang geubeut teumasok ilmè fiqah, tauhid ngen tasawuf, meunan syiet ngen seujarah indatu, sabe-sabe geu peupham bak Nyak Leman.
..........
“Teungku... teungku... Nyak Leman ka di drop le teuntra...! si droë peujuang peu intat haba keu teungku Baka  ngön muka nyang pucat that.   “Innalillahi...sigra ta minah tanyoe, siat treuk teuntra akan ji teupeu markas.  “Oh Nyak Leman, meteuwah that aneuk  nyan...” Tgk Baka seudih that haté.

Ini anak kecil kita sandera, dia itu ikut kawanan separatis...! sidroë teuntra meulapor bak atasan, nyak Leman beutōi-beutōi malang, ka lam jaroë teuntra beudōk. Teuma Nyak Leman hana meubacut pih geumetmot  abah, peuneutōh Tgk Baka that teuingat, “bek sampoë tanyoë jeut keu panglima tibang!

“Peu kah awak pai, tembak loen jinoe nye beuhe...” Nyak Leman ka geumusu., hana meubacuet pih geutakōet, si dom pih nye ka i kap akan jimeukap syiet. “Haahha.. apa dia bilang, anjing kau anak ingusan? Mana saudara kau hah? “Awakkah aneuk bajeung...! Aneuk beudé sigra di jok keu Nyak leman, teuntra beudōk hana le saba, hana ji turi aneuk miet ngen ureung tuha lagè ie Krueng ulak u tanoh Reubat. Cicém-cicém di poe teukeujet keu su beudé, tanoh Reubat beungèh, seumangat prang sabi akan sabé abadi.
Reubat, 12 November 2011

*Cerpen Sidom Reubat masuk 15 besar lomba cipta cerpen berbahasa Aceh yang diadakan PUSBADA Universitas Syiah Kuala. 15 besar karya tersebut rencananya akan dibukukan bersama para pemenang 5 besar.






Posting Komentar

0 Komentar